Seyðisfjarðarkirkja er að mörgu leyti klassísk íslensk timburkirkja að formi. En hún er með þeim stærstu og tekur um 250 manns í sæti og hún er einnig með þeim ynstu. Hún var vígð af prófasti Suður-Múla prófastsdæmis, sr. Jóni Guðsmundssyni 6. ágúst 1922.
Byggingasaga kirkjunnar er um margt merkileg en kvenfélag Seyðisfjarðar annaðist byggingu kirkjunnar á þeim stað sem hún stendur nú, svo kölluðu Gulltorgi og safnaði miklu fé til byggingarinnar. Hún stendur á steyptum grunni með turni og útbyggðum kór. Hún hefur kvistglugga og svalir. Klukkurnar eru úr gömlu Dvergasteinskirkjunni.
Hljómburður í kirkjunni er mjög góður og því er hún vinsæl fyrir tónleika hald. Í kirkjunni er 15 radda Frobenius orgel frá Danmörku.
Ljósblái liturinn sem er frá því um 1970 setur á hana sterkan og óvenjulegan svip. Og er hún þekkt og oft nefnd eftir litnum sbr. sumartónleikaröðin Bláa kirkjan. Kirkjan er mikið sótt af ferðamönnum á sumrin. (byggt á texta sr. Vigfúsar Ingvars Ingvarssonar, Kirkjur og kirkjugöngur í Múlaprófastsdæmi, 2011).
